రెజ్యుమె, జాబ్ ఇంటర్వ్యూ టిప్స్

ఉద్యోగాలకోసం దరఖాస్తు చేయడానికి ముందు పక్కా రెజ్యుమె తయారు చేసుకోవాలి. క్లుప్తంగా, తక్కువ పదాలతో ఎక్కువ వివరాలు అందించేలా ఉన్న రెజ్యుమెలు రిక్రూటర్‌ల మెప్పును పొందుతాయి. రెజ్యుమెల్లో తమ గుణగణాల గురించి పేరాల కొద్దీ రాయకుండా ఫ్యాక్ట్స్‌ను స్పష్టంగా తెలపాలి. ఇంటర్వ్యూలోనూ రెజ్యుమెలో పేర్కొన్న అంశాల ప్రస్తావన వస్తుంది. అందుకే రెజ్యుమె తయారీ నుంచే ఇంటర్వ్యూ ప్రక్రియ ప్రారంభమైనట్లే!! అంతటి ప్రాధాన్యమున్న రెజ్యుమె తయారీలో మెళకువలు.. సరైన సమాచారం: రెజ్యుమె తయారీలో ఇది చాలా ముఖ్యమైంది. కొందరు అభ్యర్థులు ఇయర్ ఆఫ్ పాసింగ్, ఎక్స్‌పీరియన్స్ తదితర అంశాలు రాయడాన్ని తేలిగ్గా తీసుకుంటారు. తప్పు సమాచారాన్ని పొందుపరుస్తుంటారు. ఇది సరైన పద్ధతి కాదు. రెజ్యుమెలో పేర్కొన్న సమాచారం సరైందో? కాదో తెలుసుకోవడానికి కంపెనీలు బ్యాగ్రౌండ్ వెరిఫికేషన్‌ను నిర్వహిస్తాయని గుర్తించాలి. రెజ్యుమెలో కచ్చితమైన, వాస్తవ సమాచారం ఇవ్వాలి. అప్పుడే జాబ్ ఇంటర్వ్యూలను ధైర్యంగా ఎదుర్కోగలుగుతారు. రెజ్యుమె నిర్మాణానికి టెంప్లేట్స్ ఉపయోగించడం తప్పుకాదు. వాటిలో తమ అభిరుచికి అనుగుణంగా అభ్యర్థులు మార్పులు చేయాలి. చదవడానికి అనువుగా... స్పష్టంగా: రెజ్యుమె తయారీలో జాగ్రత్తగా వ్యవహరించాలి. భాష సరళంగా ఉండాలి. విరామ చిహ్నాల దగ్గర్నుంచి గ్రామర్ వరకు ప్రత్యేక దృష్టి సారించాలి. రెజ్యుమెను చూడగానే అభ్యర్థికి మంచి కమ్యూనికేషన్ స్కిల్స్ ఉన్నాయనే భావన కలగాలి. పదాల పునరుక్తులు ఉండకుండా చూసుకోవాలి. సృజనాత్మకంగా రాయాలి. రెజ్యుమెలో ఎక్కువగా ‘I’, ‘me’, ‘my' వంటి పదాలనుపయోగించొద్దు. రెజ్యుమెలో అక్షర దోషాలు లేకుండా చెక్ చేసుకోవాలి. ప్రొఫెషనల్ భాషనే ఉపయోగించాలి. ప్రజెంటేషన్: రెజ్యుమె రూపకల్పనలో ప్రజెంటేషన్‌పై ఎక్కువ దృష్టిసారించాలి. సమాచారాన్ని పాయింట్ల వారీగా రాయడం ద్వారా సులువుగా చదవొచ్చు. రెజ్యుమె మొత్తంలో స్థిరమైన ఫాంట్ ఉండేలా చూసుకోవాలి. బిజినెస్ లెటర్లలో సాధారణంగా వాడే Arial, Times New Roman, Courier New ఫాంట్‌లను ఉపయోగించొచ్చు. ఫాంట్ సైజు 11 లేదా 12 ఉంటే రెజ్యుమె ఆకర్షణీయంగా కనిపిస్తుంది. హెడ్డింగులకు కూడా స్థిరమైన ఫాంట్, సైజులను కేటాయించాలి. హెడ్డింగు సైజు బాడీ టెక్ట్స్ కంటే కొంచెం పెద్దదిగా ఉండాలి. అలాగే హెడ్డింగును బోల్డ్ చేయడం, అండర్‌లైన్ చేయడంలో ఏకరూపతను పాటించాలి. రెజ్యుమెలో ఎక్కువగా మెరిసే రంగులు ఉపయోగించొద్దు. రెజ్యుమెలో బ్యాగ్రౌండ్ పిక్చర్స్, క్లిప్ ఆర్ట్స్, ఫొటోలు అవసరం లేదు. ముఖ్యమైనవి మర్చిపోవద్దు: అభ్యర్థులు రెజ్యుమె తయారీలో ఆబ్జెక్టివ్, కాంటాక్ట్ ఇన్ఫర్మేషన్, వర్క్ హిస్టరీ, ఎడ్యుకేషన్ వివరాలు, నైపుణ్యాలు, పర్సనల్ రిఫరెన్స్ తదితర అంశాల ప్రస్తావనలో నిర్లక్ష్యం ప్రదర్శించొద్దు. ఏ ఉద్యోగానికి దరఖాస్తు చేసినా ఈ ఇవి తప్పనిసరని తెలుసుకోవాలి. కెరీర్ ఆబ్జెక్టివ్: దీన్ని రెజ్యుమె లేదా కవర్‌లెటర్‌లో ప్రత్యేక అంశంగా పేర్కొనాలి. సాధారణంగా ఒకటి లేదా రెండు వాక్యాల్లో ముగించాలి. ఉద్యోగానికి ఎందు కు దరఖాస్తు చేస్తున్నారో ఆబ్జెక్టివ్‌లో స్ఫురించాలి. కాంటాక్ట్ ఇన్ఫర్మేషన్: అభ్యర్థులు తమ పేరు, ఫోన్ నంబరు, ఇ-మెయిల్ ఐడీ, ప్రొఫెషనల్ వెబ్‌సైట్ తదితర అంశాలను రెజ్యుమె పైభాగంలో చదవడానికి అనువైన ప్రదేశంలో రాయాలి. సోషల్ నెట్‌వర్క్స్, బ్లాగులు ప్రొఫెషనల్‌వైతేనే వాటి వివరాలను రెజ్యుమెలో పొందుపర్చాలి. అర్హతలు, అనుభవం: అభ్యర్థుల అకడమిక్ క్వాలిఫికేషన్, ప్రొఫెషనల్ వర్క్ ఎక్స్‌పీరియన్స్‌లను స్పష్టంగా పేర్కొనాలి. పాఠశాల విద్య, కాలేజీ కోర్సులు, టెక్నికల్ డిగ్రీ ప్రోగ్రామ్స్, సర్టిఫికేషన్స్, పొందిన అవార్డ్స్ గురించిన సమాచారాన్ని పొందుపర్చాలి. కంప్యూటర్ నాలెడ్జ్, మెకానికల్ ఎక్స్‌పీరియన్స్, భాషాపటిమ తదితర అంశాలు, ైనె పుణ్యాలనూ రాయాలి. పర్సనల్ రిఫరెన్సెస్: రెజ్యుమెలో కనీసం మూడు విశ్వసనీయ పర్సనల్ రిఫరెన్స్‌లను సమర్పించాలి. చాలా కంపెనీలు ఎక్కువ రిఫరెన్స్‌లను అడుగుతున్నాయి. ప్రతికూల అంశాలొద్దు: రెజ్యుమెలో ప్రతికూల పదాలనుపయోగించొద్దు. మీ వివరాలను సానుకూల వివరణల్లోనే రాయాలి. నిర్వహించిన బాధ్యతల కంటే సాధించిన విజయాలు ప్రస్తావిస్తే ప్రయోజనం ఉంటుంది. హాబీస్ ఉద్యోగానికి సంబంధించినవైతేనే రాయడం మంచిది. మీ వ్యక్తిగత అలవాట్ల గురించి ఎక్కువగా రాయడం సమయం, స్పేస్ రెండూ వృథా. కీస్ టు సక్సెస్: ఉద్యోగ సాధనలో రెజ్యుమె వారధిగా పనిచేస్తుంది. ఇంటర్వ్యూ స్థాయికి చేరుకోవాలనే లక్ష్యాన్ని దృష్టిలో ఉంచుకుని రెజ్యుమెను రూపొందించాలి. జాబ్ సాధించడమే ధ్యేయంగా రెజ్యుమె ఉండకూడదు. ఎందుకంటే కేవలం రెజ్యుమె మాత్రమే ఉద్యోగాన్ని సాధించిపెట్టదు. దానికి మరో ముఖ్యమైన ఇంటర్వ్యూ ఉందని అభ్యర్థులు గుర్తుంచుకోవాలి. సాధించిన విజయాల గురించి రాసేటప్పుడు అందుకు దోహదపడిన అంశాలనూ ప్రస్తావించాలి. ఇతర నైపుణ్యాలను పేర్కొనడం మర్చిపోవద్దు. వాలంటీరుగా పనిచేసిన అనుభవం, కమ్యూనిటీ సర్వీస్, మల్టిలింగువల్ లాంగ్వేజ్ స్కిల్స్, ప్రోగ్రామింగ్ లాంగ్వేజెస్, టెక్నికల్ ప్రొఫీషియన్సీస్‌నూ పేర్కొనాలి. రెండు నిమిషాల్లో రెజ్యుమెలోని అన్ని అంశాలను చదవగలిగేలా ఉండాలి. కాబట్టి అభ్యర్థులు ముఖ్యమైన సమాచారాన్ని, దరఖాస్తు చేస్తున్న ఉద్యోగానికి సరిపడే నైపుణ్యాలు మొదట పేర్కొనాలి. కవ ర్ లెటర్లు, రిఫరెన్స్‌ల్లో వివర ణాత్మకంగా రాయొచ్చు. వివిధ కంపెనీలు, దరఖాస్తు చేసుకునే ఉద్యోగాలకనుగుణంగా రెజ్యుమెలో మార్పులు చేయాలి. ఉద్యోగ నేపథ్యం, అక్కడి విధులు, నిర్వహించబోయే బాధ్యతలు, అనుభవాలను ప్రతిబింబించేలా రెజ్యుమె ఉండాలి. ఎప్పటికప్పుడు తాజా సమాచారంతో రెజ్యుమెను అప్‌డేట్ చేయడం మర్చిపోవద్దు. ................................ ఇంటర్వ్యూ టిప్స్ ఉద్యోగ నియామక ప్రక్రియల్లో ఇంటర్వ్యూ కీలక దశ. రాత పరీక్ష, గ్రూప్ డిస్కషన్‌ల్లో ప్రతిభ కనబర్చిన వారిని నేరుగా పరిశీలించేందుకు కంపెనీలు ఇంటర్వ్యూకు ఆహ్వానిస్తాయి. ఇక్కడ అభ్యర్థి సామర్థ్యాలు, నెపుణ్యాలను గుర్తించడానికి ఇంటర్వ్యూర్ కఠినమైన ప్రశ్నలు అడగవచ్చు. అభ్యర్థి వ్యక్తిత్వాన్ని అంచనా వేసేందుకు సులువైన ప్రశ్నలనూ అడగొచ్చు. ఇంటర్వ్యూలో విజయం సాధించడం అనేది.. అభ్యర్థుల ప్రజెంటేషన్, భావ వ్యక్తీకరణపైనే ఆధారపడుతుంది. ఇంటర్వ్యూలో సాధారణంగా అడిగే ప్రశ్నలు వాటికి ఏ పంథాలో జవాబు చెప్పాలో తెలుసుకుంటే సులభంగా రాణించొచ్చు!! ఇంటర్వ్యూలకు ఎంపికైన అభ్యర్థులు ముందుగా కంపెనీ చరిత్ర, లక్ష్యాలు, ప్రొడక్ట్స్, వర్క్ కల్చర్ గురించి అవగాహన ఏర్పరచుకోవాలి. వాటికి తమ స్కిల్స్‌ను అన్వయించుకోవాలి. ఆత్మవిశ్వాసంతో ఇంటర్వ్యూలను ఎదుర్కోవాలి. బాడీ లాంగ్వేజ్ విషయంలోనూ జాగ్రత్త తీసుకోవాలి. ఇంటర్వ్యూ హాల్‌లో కుర్చీలో నిటారుగా కూర్చోవడం, ఇంటర్వ్యూర్ కళ్లలోకి సూటిగా చూస్తూ సమాధానం చెప్పడం, సమాధానానికి అనుగుణంగా ముఖ కవళికలు ప్రదర్శిస్తూ ఇంటర్వ్యూర్‌ను ఆకట్టుకోవచ్చు. ఇంటర్వ్యూర్ అడిగే ప్రశ్నలను శ్రద్ధగా వినాలి. వారికి వినపడేలా సమాధానాలు చెప్పాలి. మంచి కమ్యూనికేషన్ స్కిల్స్ ప్రదర్శించాలి. ఒత్తిడిలో ఉన్నప్పుడు ఎలా స్పందిస్తారో తెలుసుకోవడానికే అభ్యర్థులను ఎక్కువ ప్రశ్నలు అడుగుతారు. ఆ సమయంలో విసుగు, అసహనం ప్రదర్శించొద్దు. అన్ని ప్రశ్నలకు నవ్వుతూ సమాధానం చెప్పాలి. ఇంటర్వ్యూలో సాధారణంగా అడిగే కొన్ని ప్రశ్నలు: ? టెల్ మి అబౌట్ యువర్‌సెల్ఫ్? ఎక్కువ శాతం ఇంటర్వ్యూల్లో అడిగే ప్రశ్న ఇది. చాలా మంది అభ్యర్థులు తమ ప్రొఫెషనల్ వివరాలతో పాటు వ్యక్తిగత సమాచారాన్ని కూడా వివరిస్తుంటారు. అయితే అభ్యర్థుల రిలేషన్ షిప్స్, బాల్యం, కుటుంబ వివరాలు తెలుసుకోవడానికి ఈ ప్రశ్న అడగలేదని అభ్యర్థులు గుర్తించాలి. విద్యాభ్యాసం, కెరీర్‌కు సంబంధించిన ప్రత్యేక ఆసక్తులు, జాబ్‌కు తగిన స్కిల్స్ గురించి వివరించాలి. ? ఈ కంపెనీనే ఎంచుకోవడానికి కారణమేంటి? అభ్యర్థుల అర్హతలు, నైపుణ్యాలు... కంపెనీ జాబ్ ప్రొఫైల్‌కు ఏ విధంగా సరిపోతాయో వివరిస్తూ ఈ ప్రశ్నకు సమాధానం చెప్పాలి. కంపెనీ ఎంపిక కోసం చేసిన కసరత్తును వివరించాలి. పరిశ్రమ గుర్తింపు, ఉత్పాదకత వంటి విషయాల ఆధారంగానే ఎంపిక జరిగిందని వివరించాలి. ఉద్యోగుల ఆలోచనలు, లక్ష్యాలకనుగుణంగా కంపెనీ లక్ష్యాలు ఉన్నప్పుడే బాగా పనిచేయగలరని వివరించాలి. ? కెరీర్ లక్ష్యాల గురించి వివరించండి? ఈ ప్రశ్నకు సమాధానం చెప్పేటప్పుడు లక్ష్యాల ప్రస్తావనతో పాటు వాటిని చేరుకోవడానికి చేయబోయే ప్రయత్నాల గురించీ వివరించాలి. ఉదాహరణకు దీర్ఘకాల లక్ష్యాలను చిన్న చిన్న లక్ష్యాలుగా విభజించుకుని లక్ష్యసాధనకు కృషి చేస్తానని చెప్పాలి. ? మీకున్న బలాలు, బలహీనతల గురించి చెప్పండి? ఇంటర్వ్యూలో బలం గురించి అడిగినప్పుడు ప్రత్యేక నైపుణ్యాలు, పని విధానం, సక్సెస్ రేటును వివరించొచ్చు. అలాగే బలహీనతల గురించి ప్రశ్నించినప్పుడు సంకోచించాల్సిన అవసరం లేదు. తప్పొప్పులు, లోటుపాట్లు లేని వారు ఎవరూ ఉండరు. బలహీనతలను చెప్పి వాటిని సరిదిద్దుకునేందుకు తీసుకుంటున్న చర్యలు వివరించాలి. ఇది కూడా అభ్యర్థుల పట్ల సానుకూల ధోరణిని పెంచుతుంది. ? మీ వ్యక్తిత్వం గురించి తెలపండి? అభ్యర్థులు ఒత్తిడి సమయంలో ఎలా ప్రవర్తిస్తారో తెలుసుకోవడానికి ఈ ప్రశ్న ఉపయోగపడుతుంది. సవాళ్లను స్వీకరించడానికి సిద్ధంగా ఉన్నారని, భిన్న పరిస్థితుల్లో పనిచేయడానికి సముఖత వ్యక్తం చేయాలి. గతంలో విజయవంతంగా పూర్తిచేసిన ప్రాజెక్టుల గురించి వివరించాలి. మరిన్ని ప్రశ్నలు: ఈ ఉద్యోగానికి నీవు ఎందుకు సరిపోగ లవని అనుకుంటున్నావు? ఈ ఉద్యోగంలో ఇతరులకంటే భిన్నంగా మీరేం చేయగలరు? ఈ ఉద్యోగం మీకే ఎందుకివ్వాలి? మీరు చేయాలనుకుంటున్న జాబ్‌లో ఏం కోరుకుంటున్నారు? మీ గురించి మీ స్నేహితుల అభిప్రాయం ఏంటి? ఇతర ఏయే ఉద్యోగాలకు దరఖాస్తు చేసుకున్నారు? మీరు అడగాల్సిన ప్రశ్నలేవైనా ఉన్నాయా? మీరు నిర్వహించిన ప్రాజెక్టుల గురించి వివరించండి?