రూరల్ మేనేజ్‌మెంట్ కోర్సులు...

దేశానికి పట్టు కొమ్మలు గ్రామాలు. అలాంటి గ్రామ ప్రాంతాల అభివృద్ధిలో కో-ఆపరేటివ్ సొసైటీలు, అభివృద్ధి ఏజెన్సీలది కీలక పాత్ర.. వీటిల్లో ప్రొఫెషనలిజం పెంచడం ద్వారా.. గ్రామాలు మరింత ముందడుగు వేసే అవకాశం ఉంది. ఈ అంశాలను దృష్టిలో ఉంచుకుని అవసరమైన కోర్సులను అందించే సంస్థ.. ఇన్‌స్టిట్యూట్ ఆఫ్ రూరల్ మేనేజ్‌మెంట్, ఆనంద్ (ఐఆర్‌ఎంఏ). 2012-13 విద్యా సంవత్సరానికి ఐఆర్‌ఎంఏ నోటిఫికేషన్ విడుదల చేసింది.

ఇన్‌స్టిట్యూట్ ఆఫ్ రూరల్ మేనేజ్‌మెంట్(ఐఆర్‌ఎంఏ)ను 1979లో గుజరాత్‌లోని ఆనంద్‌లో స్థాపించారు. పాడి పరిశ్రమలో విప్లవాత్మకమైన మార్పులు తీసుకువచ్చిన డాక్టర్ కురియన్ మార్గదర్శకం మేరకు ఈ ఇన్‌స్టిట్యూట్ పని చేస్తుంది. ఈ ఇన్‌స్టిట్యూట్ సీనియర్ సర్వీస్ మేనేజర్స్, కేంద్ర, రాష్ర్ట ప్రభుత్వ అధికారులు, ఎన్‌జీఓలు, కార్పొరేట్ సంస్థలో రూరల్ డెవలప్‌మెంట్ విభాగాల్లో పని చేసే అధికారులకు మేనేజ్‌మెంట్ డెవలప్‌మెంట్ ప్రోగ్రామ్స్ ద్వారా శిక్షణ ఇస్తుంది.

ఆఫర్ చేస్తున్న కోర్సులు: పోస్టుగ్రాడ్యుయేట్ ప్రోగ్రామ్ ఇన్ రూరల్ మేనేజ్‌మెంట్ (పీఆర్‌ఎమ్): గ్రామీణ అభివృద్ధి సంస్థల్లో, రూరల్ కో ఆపరేటివ్ సంస్థల్లో.. ప్రొఫెషనలిజంను పెంచడానికి అవసరమైన అంశాల దృష్టిలో ఉంచుకుని సిలబస్‌ను రూపొందించారు. గ్రామీణప్రాంతాల్లో చేపట్టవలసిన చర్యలు, కార్యక్రమాలకు సంబంధించిన సవాళ్లను ఎదుర్కొనేందుకు.. సంబంధిత ఆర్గనైజేషన్స్‌లో మేనేజర్‌గా విధులు నిర్వహించడానికి కావాలసిన నైపుణ్యాలను ఈ కోర్సులో బోధిస్తారు. ఈ కోర్సు క్లాస్ రూం టీచింగ్, ఫీల్డ్ వర్క్ (ఫీల్డ్ వర్క్), డెవలప్‌మెంట్ ఇంటర్న్‌షిప్, మేనేజ్‌మెంట్ ట్రైనింగ్ అని నాలుగు విభాగాలుగా ఉంటుంది.
అర్హత: గుర్తింపు పొందిన యూనివర్సిటీ నుంచి 50 శాతం మార్కులతో (ఎస్సీ, ఎస్టీలకు 45 శాతం)ఏదైనా గ్రాడ్యుయేషన్ (10+2+3 విధానంలో).

కాల వ్యవధి: రెండేళ్లు
ప్రవేశ విధానం: ఇన్‌స్టిట్యూట్ నిర్వహించే రాత పరీక్ష, ఇంటర్వ్యూ, గ్రూప్ డిస్కషన్ ఆధారంగా. ప్రీవియస్ కొశ్చన్ పేపర్స్‌ను వెబ్‌సైట్ నుంచి డౌన్‌లోడ్ చేసుకోవచ్చు.

ఫెలో ప్రోగ్రాం ఇన్ రూరల్ మేనేజ్‌మెంట్ (ఎఫ్‌పీఆర్‌ఎమ్):
ఇది కోర్సు బేస్డ్ డాక్టోరల్ రెసిడెన్సీ ప్రోగ్రామ్. ఈ కోర్సులో భాగంగా పలు రకాల స్పెషలైజేషన్స్‌ను ఎంచుకోవాలి. అవి.. మేనేజ్‌మెంట్, అగ్రి బిజినెస్/రూరల్ మార్కెటింగ్, నేచురల్ రీసోర్స్ మేనేజ్‌మెంట్, డెవలప్‌మెంట్ మేనేజ్‌మెంట్, మైక్రో ఫైనాన్స్ మేనేజ్‌మెంట్, గవర్ననెస్ అండ్ లైవ్లీహుడ్స్, రూరల్ ఇన్ఫాస్ట్రక్చర్ అండ్ సర్వీసెస్ మేనేజ్‌మెంట్, పబ్లిక్ పాలసీ అండ్ నాన్ ప్రాఫిట్ మేనేజ్‌మెంట్.

అర్హత: గుర్తింపు పొందిన యూనివర్సిటీ నుంచి 55 శాతం మార్కులతోఏదైనా సబ్జెక్ట్‌లో పోస్ట్‌గ్రాడ్యుయేషన్. డిగ్రీలో 50 శాతం మార్కులు ఉండాలి. లేదా ఐఆర్‌ఎంఏ నుంచి పీజీడిప్లొమా ఇన్ మేనేజ్‌మెంట్ లేదా 60 శాతం మార్కులతో ప్రొఫెషనల్ డిగ్రీ (ఇంజనీరింగ్, మెడిసిన్, అగ్రికల్చరల్, సెన్సైస్)తోపాటు మూడేళ్ల అనుభవం (ఐదేళ్ల డిగ్రీకి-సంవత్సరం).

ఫెలోషిప్:
ఈ ప్రోగ్రామ్‌కు ఎంపికైన అభ్యర్థులకు ఫెలోషిప్ కూడా అందజేస్తారు. ప్రారంభంలో నెలకు రూ.14,000 ఫెలోషిప్ చెల్లిస్తారు. తర్వాత ఉండే క్వాలిఫైయింగ్ ఎగ్జామినేషన్‌లో ఉత్తీర్ణులైన వారికి నెలకు రూ.16,000 ఫెలోషిప్ ఉంటుంది. ఇవికాకుండా కంటిన్‌జెన్సీ నిధుల కింద సంవత్సరానికి రూ. 20,000 చొప్పున నాలుగేళ్లు ఇస్తారు.

ప్రవేశ విధానం: రాత పరీక్ష, ఇంటర్వ్యూ ఆధారంగా ఎంపిక చేస్తారు. దీంతోపాటు ఒక వ్యాసాన్ని కూడా ప్రెజెంట్ చేయాల్సి ఉంటుంది. అలాగే మేనేజ్ మెంట్, సోషల్ వర్క్, ఎకనామిక్స్, సోషియాలజీ, సైకాలజీ, కామర్స్‌లో యూజీసీ-జేఆర్‌ఎఫ్/సీఎఎస్‌ఐఆర్ నెట్‌లో ఉత్తీర్ణులైన అభ్యర్థులు రాత పరీక్షకు హాజరు కావల్సిన అవసరం లేదు. వీరికి ఇంటర్వ్యూ నిర్వహించి ప్రవేశం కల్పిస్తారు. ప్రీవియస్ కొశ్చన్ పేపర్స్‌ను వెబ్‌సైట్ నుంచి డౌన్‌లోడ్ చేసుకోవచ్చు.

స్కాలర్‌షిప్-ప్లేస్‌మెంట్స్: ఐఆర్‌ఎంఏ విద్యార్థులకు రతన్‌టాటా స్కాలర్‌షిప్‌తోపాటు అన్ని రకాల ప్రభుత్వ, ప్రైవేట్ స్కాలర్‌షిప్స్ అందుబాటులో ఉంటాయి. అంతేకాకుండా 15 మంది ఎస్సీ, ఎస్టీ విద్యార్థులకు కేంద్ర ప్రభుత్వం స్కాలర్ షిప్ మంజూరు చేస్తుంది. ఈ ఇన్‌స్టిట్యూట్ దారిద్య్రరేఖకు దిగువన(బీపీఎల్) ఉన్న పేద విద్యార్థులకు ట్యూషన్ ఫీజులో కొంత మినహాయింపు ఇస్తుంది. ఇన్‌స్టిట్యూట్ విద్యార్థులకు స్టేట్ బ్యాంక్ ఆఫ్ ఇండియా-ఆనంద్, సెంట్రల్ బ్యాంక్ ఆఫ్ ఇండియా ఎటువంటి హామీ లేకుండా ఎడ్యుకేషన్ లోన్ అందిస్తుంది. ప్లేస్‌మెంట్ విషయంలో కూడా ఐఆర్‌ఎంఏకు మంచి ట్రాక్ రికార్డు ఉంది. ఇక్కడి అభ్యర్థులు వివిధ యూనివర్సిటీలు, కాలేజీలు, ఎన్‌ఎంసీలతోపాటు ప్రఖ్యాత ఇండియన్ ఇన్‌స్టిట్యూట్ ఆఫ్ మేనేజ్‌మెంట్(ఐఐఎం)లలో వివిధ హోదాల్లో స్థిర పడ్డారు.

కెరీర్:
రూరల్ మేనేజ్‌మెంట్ కోర్సు చేసిన వారికి కేంద్ర, రాష్ట్ర గ్రామీణాభివృద్ధి సంస్థల్లో విస్త్రత ఉద్యోగావకాశాలు ఉంటాయి. రూరల్ డెవలప్‌మెంట్, కమ్యూనిటీ మొబలైజేషన్, మేనేజింగ్ కలెక్టివ్స్, ప్రాజెక్ట్ మేనేజ్‌మెంట్, ప్లానింగ్ అండ్ ఇన్ఫర్మేషన్ సిస్టమ్స్, ప్రొడెక్షన్ మేనేజ్ మెంట్, ఫైనాన్స్ అండ్ అకౌంట్స్, హ్యూమన్ రీసోర్స్ డెవలప్‌మెంట్, నేచురల్ రీసోర్స్ మేనేజ్‌మెంట్ విభాగాల్లో అవకాశాలు లభిస్తాయి. గ్రామీణాప్రాంతాల అభివృద్ధికోసం పనిచేసే వివిధ ప్రైవేట్ సంస్థల్లో, ఎన్‌జీవోలలో ఉపాధి అవకాశాలు లభించవచ్చు. పీహెచ్‌డీ పూర్తి చేసిన వారు వివిధ యూనివర్సిటీలు, కాలేజీల్లో రూరల్ డెవలప్‌మెంట్, మేనేజ్‌మెంట్ విభాగాల్లో ఫ్యాకల్టీగా అవకాశాలను పొందవచ్చు. ఈ కోర్సు ఉత్తీర్ణులకు సంవత్సరానికి రూ.8 లక్షల వరకు వేతనం లభించవచ్చు.

దరఖాస్తు: వెబ్‌సైట్ నుంచి ఆన్‌లైన్‌లో దరఖాస్తు చేసుకోవచ్చు.ఆన్‌లైన్‌లో దరఖాస్తు చేసుకున్న తర్వాత హార్డ్‌కాపీని ప్రింట్ అవు ట్ తీసి కింది చిరునామాకు పంపాలి. లేదా వెబ్‌సైట్ నుంచి కూడా దరఖాస్తులను డౌన్‌లోడ్ చేసుకోవచ్చు.
అడ్మిషన్స్ ఆఫీసు, ఇన్‌స్టిట్యూట్ ఆఫ్ రూరల్ మేనేజ్‌మెంట్ అండ్- ఆనంద్(ఐఆర్‌ఎంఏ)
ఆనంద్-388 001, గుజరాత్.

ముఖ్యతేదీలు:
దరఖాస్తుల స్వీకరణకు చివరితేదీ: సెప్టెంబర్ 30, 2012
పరీక్ష తేదీ: నవంబర్ 11
రాష్ట్రంలో పరీక్ష కేంద్రాలు: హైదరాబాద్, విజయవాడ.
వివరాలకు: www.irma.ac.in